Dat Konrad-Struve-Huus

Dat Huus an de Bismarckstroot 1 is an’n End vun de twintiger Johrn vun dat vörige Johrhunnert vun den Elmshorner Fabrikbesitter Korl Rostock baut worrn, keem en poor Johr loter in de Hannen vun de Stadt Elmshorn un weer bit Anfang vun de negenteinhunnertsösstiger Johrn Wohnung för de Börgermeisters vun de Stadt. Achterno trock hier dat Standesamt in un af 1972 dat Elmshorner Heimatmuseum. Sienen Nomen kreeg dat Huus na den heel bekannten Elmshorner Heimatforscher Konrad Struve, de 1932 vun den Magistroot den Opdrag kregen harr, en Heimatmuseum op de Been to stellen. As 1991 in de Catharinenstroot en Industriemuseum grünnt worr, is dat Konrad-Struve-Museum opdeelt worrn. De gröttste Deel trock mit üm in dat nee’e Museum, eenige Utstellungsstücken bleben an’e Bismarckstroot. An’n 30. August 1992 trocken de Elmshorner Heimatvereen "Tru un fast" un de Elmshorner Vereenigung för Familienkunde in dat ehemolige Museum in, dat nu den Nomen "Konrad-Struve-Huus för Ortsgeschichte" kreeg. Siet 2011 warrd dat Museum ümbaut un sall neven de beiden Vereene ok wedder dat ganze Heimatmuseum opnehmen.